সকলোৱে দৃষ্টি নিবদ্ধ থকা মাকুমপথাৰ গাওঁ পঞ্চায়তৰ সভাপতি বাছনিৰ প্ৰক্ৰিয়া সম্পন্ন।*মম্পী সিং দত্তৰ মাকুমপথাৰ গাওঁ পঞ্চায়তৰ সভাপতি নিৰ্বাচিত* মাকুমপথাৰ গাওঁ পঞ্চায়তৰ সভাপতি বাছনিৰ প্ৰক্ৰিয়া সম্পন্ন। পুনৰ দ্বিতীয়টো কাৰ্যকালৰ বাবে মাকুমপথাৰ গাওঁ পঞ্চায়তৰ সভাপতি হিচাপে নিৰ্বাচিত হয় মম্পী সিং দত্তৰ। মম্পী সিং দত্তৰ এইবাৰ সভাপতি পদৰ বাবে তীব্ৰ বাধা সন্মূখীন হ'ব বুলি ধাৰণা কৰা হৈছিল যদিও সকলো প্ৰত্যাহ্বান নেওচি সভাপতি হিচাপে নিৰ্বাচিত হয় মম্পী সিং দত্ত। মাৰ্ঘেৰিটা খণ্ড উন্নয়ন বিষয়া কাৰ্যলয়ত অনুষ্ঠিত হোৱা মাকুমপথাৰ গাওঁ পঞ্চায়তৰ সভাপতি বাছনিৰ প্ৰক্ৰিয়াত প্ৰথম পৰ্যায়ত বিৰোধীতা থাকিলেও আজি কিন্তু পঞ্চায়তৰ সকলো সদস্যই মম্পী সিং দত্তকে সমৰ্থন আগবঢ়াই। নৱ নিৰ্বাচিত পঞ্চায়ত সভাপতি মম্পী সিং দত্তই সভাপতি হিচাপে নিৰ্বাচিত কৰাৰ বাবে প্ৰতি গৰাকীৰ ৱাৰ্ড সদস্যক ধন্যবাদ জ্ঞাপন কৰাৰ লগতে আগন্তুক দিনত পঞ্চায়তখনৰ উন্নয়নৰ স্বাৰ্থত কাম কৰি যোৱা কথা দোহাৰে।বাইটঃ মম্পী সিং দত্ত, নৱ নিৰ্বাচিত সভাপতি,মাকুমপথাৰ গাওঁ পঞ্চায়ত।

কাকপথাৰৰ বৰডিৰাক গোঁসাই গাওঁৰ পৰা অপহৰণ কৰা কিশোৰী ববী মহন্তক অৰুণাচলৰ তেজুৰ হোষ্টেলত উদ্ধাৰ।
    
তিনিচুকীয়া জিলাৰ বৰডুমচা অাৰক্ষী থানাৰ অন্তৰ্গত বৰডিৰাক গোঁসাই গাওঁৰ নিজ গৃহৰ পৰা দ্বিতীয় শ্ৰেণীৰ ছাত্ৰী ববী মহন্তক অপহৰণ কৰা ঘটনাৰ প্ৰায় দুমাহৰো অধিক কাল অতিক্ৰম কৰাৰ পিছত কালিহে অৰুণাচল অাৰক্ষীৰ বিশেষ শাখাই এক খবৰৰ ভিত্তিত তেজুৰ এখন ব্যক্তিগত বিদ্যালয়ৰ হোষ্টেলৰ পৰা অপহৃত কিশোৰী গৰাকীক উদ্ধাৰ কৰি অসমৰ সীমামূৰীয়া থানা বৰডুমচা অাৰক্ষীক গতাই দিয়ে।অৰুণাচলৰ চাংলাং জিলাৰ খ্ৰাচাং ৰত্নপুৰ গাওঁৰ অজিত চাকমা নামৰ লোকজনে ১১ জুলাইত কিশোৰী গৰাকীক অপহৰণ কৰি নি তেজু চহৰৰ এজন বিশেষ লোকৰ ওচৰত চমজাই দিয়ে।তেজুৰ এই বিশেষ ব্যক্তিজনে তেজু প্ৰায়মেৰী স্কুলত ববী মহন্ত নামৰ কিশোৰী গৰাকীক নামভৰ্তি কৰোৱাই হোষ্টেলতে থকাৰ ব্যৱস্থা কৰি দিয়ে।কিন্তু অৰুণাচল অাৰক্ষীৰ বিশেষ শাখাই দীৰ্ঘদিন ধৰি অনুসন্ধান কৰাৰ অন্তত ববী মহন্তক উক্ত বিদ্যালয়খনৰ হোষ্টেলত থকাৰ সম্ভেদ লাভ কৰাত কালি দিনৰ ভাগত গৈ হোষ্টেলৰ পৰা উদ্ধাৰ কৰে।ইফালে বৰডুমচা অাৰক্ষীয়ে  বিয়লি পৰত পৰিয়ালৰ লোকক ববী মহন্তক চমজাই দিয়ে।লগতে ঘটনাৰ সৈতে জঢ়িত দোষী ব্যক্তিৰ বিৰুদ্ধে যথাবিহিত ব্যৱস্থা গ্ৰহনৰ বাবে তদন্ত পক্ৰিয়া অাৰম্ভ কৰে। উল্লেখ্য যে, বৰডিৰাক গোঁসাই গাওঁৰ বেনাই মহন্ত নামৰ লোকজনৰ ৮ বছৰীয়া কন্যা ববী মহন্তক চক্লেট দি বজাৰৰ পৰা চেণ্ডেল কিনি দিয়াৰ প্ৰলোভন দি এজন অৰুণাচলী লোকে ১১ জুলাইত অপহৰণ কৰি নিয়ে।নিজকে চাংলাং জিলাৰ ডায়ুনৰ চাকমা বুলি পৰিচয় দিয়া লোকজনে পূৰ্বে গোঁসাই গাওঁলৈ অহা যোৱা কৰিছিল।পিছলৈ যোৱা ১০ জুলাই মঙ্গলবাৰে  বিয়লি বেনাই মহন্তৰ ঘৰলৈ অাহি নিশাটোৰ বাবে অাশ্ৰয় বিচাৰিছিল।অজলা খেতিয়ক বেনাই মহন্তই নিশাটোৰ বাবে অাশ্ৰয় দিয়া অৰুণাচলী লোকজনে পূৱা ঘৰত পিতৃৰ অনুপস্থিতিত কণমানি ছোৱালীজনীক ফুচুলাই মাক অাৰু বায়েকৰ অনুমতি অবিহনে বজাৰলৈ বুলি লৈ যায়।ইয়াৰ পিছত বিয়লিলৈ ঘৰলৈ ঘূৰি নহাতহে পৰিয়ালৰ লোকে বিচাৰ খোচাৰ কৰাত লোকজনে অপহৰন কৰাটো নিশ্চিত হৈছিল।পিছলৈ এই ঘটনাক লৈ স্থানীয় ৰাইজ তথা দল সংগঠনে অপহৃত কিশোৰীক উদ্ধাৰৰ বাবে প্ৰতিবাদী কাৰ্যসুচীও গ্ৰহন কৰিছিল।সন্প্ৰতি কিশোৰী গৰাকীক কালি নিজ গৃহলৈ লৈ অনাৰ পিছৰে পৰা মৌনতা অৱলম্বন কৰা বুলি পৰিয়ালটিয়ে জানিবলৈ দিয়াত ঘটনাতো অধিক ৰহস্যঘন হৈ পৰিছে।