সকলোৱে দৃষ্টি নিবদ্ধ থকা মাকুমপথাৰ গাওঁ পঞ্চায়তৰ সভাপতি বাছনিৰ প্ৰক্ৰিয়া সম্পন্ন।*মম্পী সিং দত্তৰ মাকুমপথাৰ গাওঁ পঞ্চায়তৰ সভাপতি নিৰ্বাচিত* মাকুমপথাৰ গাওঁ পঞ্চায়তৰ সভাপতি বাছনিৰ প্ৰক্ৰিয়া সম্পন্ন। পুনৰ দ্বিতীয়টো কাৰ্যকালৰ বাবে মাকুমপথাৰ গাওঁ পঞ্চায়তৰ সভাপতি হিচাপে নিৰ্বাচিত হয় মম্পী সিং দত্তৰ। মম্পী সিং দত্তৰ এইবাৰ সভাপতি পদৰ বাবে তীব্ৰ বাধা সন্মূখীন হ'ব বুলি ধাৰণা কৰা হৈছিল যদিও সকলো প্ৰত্যাহ্বান নেওচি সভাপতি হিচাপে নিৰ্বাচিত হয় মম্পী সিং দত্ত। মাৰ্ঘেৰিটা খণ্ড উন্নয়ন বিষয়া কাৰ্যলয়ত অনুষ্ঠিত হোৱা মাকুমপথাৰ গাওঁ পঞ্চায়তৰ সভাপতি বাছনিৰ প্ৰক্ৰিয়াত প্ৰথম পৰ্যায়ত বিৰোধীতা থাকিলেও আজি কিন্তু পঞ্চায়তৰ সকলো সদস্যই মম্পী সিং দত্তকে সমৰ্থন আগবঢ়াই। নৱ নিৰ্বাচিত পঞ্চায়ত সভাপতি মম্পী সিং দত্তই সভাপতি হিচাপে নিৰ্বাচিত কৰাৰ বাবে প্ৰতি গৰাকীৰ ৱাৰ্ড সদস্যক ধন্যবাদ জ্ঞাপন কৰাৰ লগতে আগন্তুক দিনত পঞ্চায়তখনৰ উন্নয়নৰ স্বাৰ্থত কাম কৰি যোৱা কথা দোহাৰে।বাইটঃ মম্পী সিং দত্ত, নৱ নিৰ্বাচিত সভাপতি,মাকুমপথাৰ গাওঁ পঞ্চায়ত।

মাৰ্ঘেৰিটাত   ড্ৰাগছৰ ৰমৰমীয়া বেহাঃ ধৃত ড্ৰাগছ বেপাৰী আটক
     ৬ছেপ্টেম্বৰঃ- তিনিচুকীয়াৰ জিলাৰ লেখাপানীত আজি আৰক্ষীয়ে অভিযান চলাই এটা  ড্ৰাগছ ব্যৱসায়ী আটক কৰে ৷ ধৃত ড্ৰাগছ ব্যৱসায়ী জনৰ নাম প্ৰেম সোনাৰ (৩৩) বুলি জানিব পৰা গৈছে ।  ড্ৰাগছ ব্যৱসায়ী প্ৰেম সোনাৰৰ পৰা  ৩৪ গ্ৰাম হেৰ’ইনৰ সহ লেখাপানীৰ থানাৰ অন্তৰ্গত তিনি মাইলৰ পৰা আটক কৰে লেখাপানী আৰক্ষীয়ে৷ ধৃত ব্যৱসায়ী জনৰ বিৰুদ্ধে নিচাযুক্ত আইনৰ অধিনৰ ধাৰাত এক গোচৰ ৰুজু কৰি জেৰা অব্যাহত ৰাখিছে ৷ উল্লেখ যে মাৰ্ঘেৰিটা মহকুমাত ড্ৰাগছ-কানীৰ ৰমৰমীয়া বেহা অব্যাহত থকাৰ অভিযোগ উত্থাপন হৈ আহিছে । জিলাখনৰ মাৰ্ঘেৰিটা মহকুমাৰ পেঙেৰী থানাৰ অন্তৰ্গত উলুপ,ইনথেম,নগাপথাৰ, লালমাটি, ব্ৰহ্মাজান, কেতেতং আদি অঞ্চলত মাৰাত্মক ড্ৰাগছৰ কৱলত পৰিছে একাংশ যুৱক। এই অঞ্চল সমূহৰ একাংশ লোকেই স্থানীয় প্ৰশাসনক "মেনেজ" কৰি অঞ্চলটোত ড্ৰাগছৰ ৰমৰমীয়া ব্যৱসায় চলাই থকা বুলি অভিযোগ কৰিছে স্থানীয় ৰাইজে। ইয়াৰো পৰি মাৰ্ঘেৰিটা, লিডু, জাগুন, লেখাপানী আদি অঞ্চল সমূহতো মাৰাত্মক ড্ৰাগছৰ সমান্তৰালকৈ এচাম অসাধু কুখ্যাত বেপাৰীয়ে অব্যাহত ৰাখিছে কানি-গাঞ্জাৰ ৰমৰমীয়া বেহা। মাৰ্ঘেৰিটা মহকুমাকে ধৰি তিনিচুকীয়া জিলাৰ বিভাগীয় কৰ্তৃপক্ষৰ সোপাঢিলা নীতিৰ সুযোগ গ্ৰহণ কৰি এই সকল সমাজ বিৰোধী ধুৰন্ধৰ প্ৰকৃতিৰ লোকে মাৰাত্মক ড্ৰাগছ, কানি-গাঞ্জাকে ধৰি নিচা জাতীয় দ্ৰব্যৰ ৰমৰমীয়া বেহা উলুপ, কেটেটং, বৰফাকিয়াল, বাঁহবাৰী, বিচা, মৌংলাং খামটি, কথা, জাগুন, বৰগোলাই, মাৰ্ঘেৰিটা এ পি অ কলনিকে ধৰি আদি অঞ্চল সমূহত এতিয়া মুক্ত ৰূপত নিচা জাতীয় দ্ৰব্যৰ এখন মুকলি বজাৰ গঢ়ি তুলিছে। অন্যহাতে আবকাৰী বিভাগৰ লোকে নিয়ম মাফিক তালাচীৰে দুই এজন লোকক ধৰি বাহঃ বাঃ লোৱাৰ বিপৰীতে প্ৰকৃত বেপাৰী সকল গোপন বুজাবুজিৰ বাবেই অভিযানত ধৰা নপৰে বুলি মুকলিকৈ অভিযোগ কৰিছে স্থানীয় ৰাইজে। বিশেষকৈ মহকুমাটোৰ  লেখাপানী আৰক্ষী থানাৰ অন্তৰ্গত নিংগাম, টাইফাকে আৰু মাৰ্ঘেৰিটা আৰক্ষী থানাৰ অন্তৰ্গত  কেটেটং, ইনথেম, নংলাই, ডিবঙকে  আদি কৰি জনগোষ্ঠীয় প্ৰধান অঞ্চল সমূহত  এতিয়া গাঞ্জা কানিৰ মুক্ত প্ৰচলনে মহকুমাটোৰ একাংশ তথাকথিত সম্ভ্ৰান্ত পৰিয়ালৰ যুৱকক বাৰুকৈয়ে গ্ৰাস কৰি পেলোৱাৰ লগতে বৰডুমচা থানাৰ অন্তৰ্গত অসম-অৰুণাচল প্ৰদেশৰ কাষৰীয়া অঞ্চল সমূহতো ইয়াৰ ব্যাপক পয়োভৰে বাৰুকৈয়ে জলাকলা খুৱাইছে একাংশ লোকক।ইপিনে একাংশ স্কুল-কলেজৰ ছাত্ৰয়ো এনে নিচাযুক্ত মাৰাত্মক দ্ৰব্যৰ কৱলত পৰা বুলি উল্লেখ কৰাৰ লগতে উলুপ-ইনথেম গাৱৰ একাংশ মহিলা লগ হৈ নগা পথাৰৰ নিবাসী গুডু গোহাঁই,মাইচাংপানী গাঁ‌ৱৰ নিবাসী সঞ্জীৱ সোনোৱাল আৰু তিনিচুকীয়াৰ মাকুমৰ নিবাসী  ওম বৰুৱাক ড্ৰাগছ সেৱন কৰি থকা অৱস্থাত হাতে লোতে ধৰি  পেঙেৰী আৰক্ষীক গতাই দিছিল। মহকুমাটোত দীৰ্ঘ দিনৰ পৰা অব্যাহত থকা এনে নিচা জাতীয় দ্ৰব্যৰ বেহাৰ সন্দৰ্ভত বিভিন্ন সময়ত স্থানীয় ৰাইজৰ লগতে দল সংগঠন সমূহেও বিভাগীয় কৰ্তৃপক্ষক অৱগত কৰি আহিছে যদিও এই বেহাৰ বিৰুদ্ধে কোনো এটা পক্ষকে অদ্যাপি উপযুক্ত ব্যৱস্থা লোৱা পৰিলক্ষিত নহ’ল। যাৰ পৰিণতিত মহকুমাটোত এতিয়া পূৰ্বতকৈ ওঁ অধিক ক্ষিপ্ৰতাৰে ভিন্ন প্ৰান্তলৈ  শিপাব ধৰিছে গাঞ্জা কানিৰ লগতে ড্ৰাগছৰ এই ভয়াৱহ বেহাটো। সকলোতকৈ ডাঙৰ কথাটো হল মহকুমাটোত অব্যাহত থকা সামাজিক পৰিৱেশ বিনষ্টকাৰী এই সমূহ নীচজাতীয় দ্ৰব্যৰ বেহাৰ সন্দৰ্ভত সকলোৰে অৱগত যদিও বিভাগীয় কৰ্তৃপক্ষই কিহৰ স্বাৰ্থত এই সমূহৰ বিৰুদ্ধে কঠোৰ ব্যৱস্থা গ্ৰহণ নকৰে সেয়াহে এতিয়া অঞ্চলবাসীৰ বাবে এক ৰহস্যৰ বিষয় হৈ পৰিছে বুলি প্ৰশ্ন উত্থাপন কৰি মাৰ্ঘেৰিটাৰ  মহকুমাধিপতি সুমিত সত্তাৱনক তাৎক্ষণিক হস্তক্ষেপৰ দাবী তুলিছে স্থানীয় ৰাইজে। অন্যথা স্থানীয় ৰাইজে দল সংগঠনৰ সহযোগত তীব্ৰ প্ৰতিবাদী আন্দোলন কাৰ্যসূচী হাতত ল’ব বুলি জনাইছে।