স্বাধীনোত্তৰ কালৰ পৰা উন্নয়নৰ মূখ নেদেখা এখন গাওঁ। গাওঁখনৰ নাম নতুন সঞ্জুৱাৰা। ৪২ টাকৈ তাংছা আৰু চেমা পৰিয়ালৰ লোকে বসবাস কৰা গাওঁখনত ৰূপায়ণ হোৱা নাই অসম চৰকাৰে ৰূপায়ণ কৰা কোনো ধৰণৰ চৰকাৰী আঁচনি। অসম অৰুণাচল প্ৰদেশৰ সীমান্তবৰ্তী ৮৩ নং মাৰ্ঘেৰিটা বিধানসভা সমষ্টিৰ অন্তৰ্গত এখন গাওঁ‌ হৈছে নতুন সঞ্জুৱাৰা গাওঁ‌। ভাৰতবৰ্ষ স্বাধীন হোৱাৰ দিনৰে পৰা গাওঁখনত আজি পৰ্যন্ত কোনো ধৰণৰ উন্নতি নোহোৱা বুলি অভিযোগ উত্থাপন কৰিছে গাওঁখনৰ বাসিন্দাই। এখন মাত্ৰ তুলুঙা নাৱৰ দ্বাৰাই গাওঁখনৰ লোক যাব লাগে বজাৰ কিম্বা অন্য যাৱতীয় কামত। ইপিনে গাওঁখনৰ বাসিন্দাই অসম চৰকাৰৰ মাহীআইৰ সদৃশ দৃষ্টিত অতীষ্ঠ হৈ অৰুণাচলত চামিল হোৱাৰ ইচ্ছা প্ৰকাশ কৰা পৰিলক্ষিত হৈছে। অসম চৰকাৰে ৰূপায়ণ কৰা সকলো ধৰণৰ চৰকাৰী আঁচনিৰ পৰা বঞ্চিত হোৱাৰ বিপৰীতে অৰুণাচল চৰকাৰৰ পৰা লাভ কৰিছে সকলো ধৰণৰ যাৱতীয় সা-সুবিধা। ঠিক এনে এক কাৰণতে হৈতো নতুন সঞ্জুৱাৰা গাঁওবাসীয়ে মন মেলিছে অৰুণাচল প্ৰদেশৰ লগত চামিল হবলৈ।অসম চৰকাৰৰ অধীনস্থ সীমা উন্নয়ন বিভাগ নামৰ এটা বিয়াগোম বিভাগ থকাৰ পিছতো আজিকোপতি সীমামুৰীয়া অঞ্চলটোৰ কোনো ধৰণৰ উন্নয়ন নোহোৱাত অঞ্চলবাসী ক্ষোভিত হৈ পৰিছে। আনহাতে গাওঁবাসীয়ে গাঁ‌ঠিৰ ধন ভাঙি গাওঁ খনত বিজুলীবাতি সংযোগ নিজেই কৰি লোৱা বুলি সদৰী কৰিছে যদিও বিভাগীয় বিদ্যুৎ মাচুল সময়মতে পৰিশোধ কৰি থকা বুলিও সদৰি কৰিছে।বিজুলি ব্যৱস্থা, পথৰ সু ব্যৱস্থা, চিকিৎসালয়, বিদ্যালয় আদি কোনো ধৰণৰ উন্নয়ন নোহোৱাত অৰুণাচল চৰকাৰৰ লগত সংযোগ হোৱাত ইচ্ছা প্ৰকাশ কৰিছে গাওঁবাসীয়ে। অন্যহাতে, টিৰাপ নদীত এখন দলং নিৰ্মাণ কৰি উক্ত গাওঁখনত যোগাযোগ ব্যৱস্থা সুচল কৰিবৰ বাবে আহ্বান জনাইছে।